"Nilikha tayo ng Allah para sa isang layunin, at sa pamamagitan ng pagsunod sa Islam, natutupad natin ang layuning ito: ang sambahin ang Allah lamang nang hindi nagtatambal ng anumang katambal sa Kanya, at ang pag-asa at pagtitiwala sa Kanya lamang.
Nais Niya ang kaligayahan para sa atin sa mundong ito gayundin sa Kabilang-Buhay, at ipinagkaloob Niya sa atin ang susi sa tunay na kaligayahang ito. Ang Qur'an ay naglalaman ng mga sagot sa pinakadakilang misteryo sa buhay. Ito ay nagtutulak sa atin na malampasan ang materyalismo at mapagtanto na ang buhay na ito ay panandalian lamang bago maabot ang walang hanggang buhay sa Kabilang Buhay.
Kaya, pinalaya natin ang ating mga sarili mula sa pagsamba at pagiging alipin ng mga bagay, sistema, at gawa ng tao na mga paraan ng pamumuhay, nagiging tapat na mga lingkod ng Allah, na kinikilala na Siya ang may-ari ng lahat ng bagay.
Ang ibig sabihin ng pagiging Muslim ay ang ganap na pagpapasakop sa iyong Tagapaglikha at kilalanin na tayo ay nilikha para sa walang ibang layunin kundi sambahin Siya. Ito ang pinakalayunin ng ating pag-iral dito sa lupa, sa tila walang katapusan na sansinukob na ito: ang sambahin ang Allah lamang.
Ang pagyakap sa Islam ay nagpapalaya sa atin mula sa isang kasalanan na maaaring hindi mapapatawad: ang pagtatambal sa Allah (shirk).
"Hindi Ako lumikha ng jinn at tao kundi upang sumamba sila sa Akin." (Qur'an 51:56)
“O mga kababayan ko, sumamba kayo kay Allāh; walang ukol sa inyo na anumang Diyos na iba pa sa Kanya. Tunay na ako ay nangangamba para sa inyo sa pagdurusa sa isang araw na sukdulan” (Qur'an 7:59)
Dapat bigyang-diin na hindi kailangan ng Allah ang ating pagsamba; sa halip, tayong mga tao ang nangangailangan ng Allah. Kailangan natin ang pakiramdam ng katiwasayan at kapayapaan na nagmumula sa pagsamba sa Kanya."
